گەورەترین پێشبڕکێی جیهانی لەبواری یاسای نێودەوڵەتی گروپێک لەفێرخوازانی زانکۆکەمان نوێنەرایەتیی عێراق دەکات تیایدا

Monday, February 19, 2018 - 17:15

 

١٩ ی شوباتی ٢٠١٨ (سلێمانی – هەرێمی کوردستانی عێراق): پاش ئەوەی رۆژی ١٢ ی شوباتی ئەمساڵ پلەی یەکەمی بەدەست هێنا لەپێشبڕكێی بەراییدا لەهەولێر، گروپێک لەفێرخوازانی زانکۆی ئەمریکیی عێراق، سلێمانی نوێنەرایەتیی عێراق دەکات لەخولی پەنجاو نۆیەمینی پێشبڕکێی فیلیب سی جیسوب "پێشبڕکێیەکە لەبواری یاسای نێودەوڵەتی"کە مانگی نیسانی ئەمساڵ لەواشنتۆن ساز دەکرێت.

پێشبڕکێی جیسوب گەورەترین پێشبڕکێی جیهانییە لەبواری یاسای نێودەوڵەتی، نماییشسازییەکە بۆ بەڕێوەبردن و خستنەڕوی دادگاییگەلی نمایشی "محاكمات إفتراضية" لەبواری یاسای نیودەوڵەتی.

لەخولی ئەمساڵیدا کە خولی پەنجاو نۆیەمینیەتی، ٦٤٥ کۆلیجی یاسا لە٩٥ وڵاتەوە بەشداری دەکەن. گروپە بەشداربوەکان نوێنەرایەتیی وڵاتەکانیان دەکەن لەدادگاییگەلی نماییشیدا،  لەبەردەم دەستەیەک دادوەری پسپۆڕدا، کە ئەمە وایان لێدەکات شارەزایی پەیدا بکەن  لەبارەی چۆنیەتیی بەڕێوەچونی دادگاییگەلی نێودەوڵەتییەوە لەبەردەم دادگای عەدلی نێودەوڵەتی کە دەزگای قەزایی سەرەکیی نەتەوە یەکگرتوەکانە.    

پرۆفیسۆر د.عەلی ئەحمەد سەرپەرشتیی گروپی زانکۆی ئەمریکیی عێراق، سلێمانی دەکات کە پێکهاتوە لە لیندا ئەلکەریم، محەممەد فاتیح، محەممەد ناسیح، راوێژ عوسمان و شاتو دیار بەکر.

گروپی زانکۆی ئەمریکیی سلێمانی، لەکێبەرکێیەکدا لەگەڵ سێ گروپی تر، لەبەردەم دەستەیەک دادوەر کە بریتیبون لە ١٠ دادوەر، بەشداریی پێشبڕکێی بەرایی کردوە  لەزانکۆی سەڵاحەدین لەهەولێرو پلەی یەکەمی بەدەست هێناوە.

پرۆفیسۆر د.عەلی ئەحمەد دەربارەی لێهاتویی گروپەکەی دەڵێت: "گروپەکە بەسەر چەندین ئاستەنگیدا زاڵ بو ، سەرەنجام کەوتە پێش هەندێک لەباشترین فێرخوازانی بواری یاساوە لەوڵاتەکەدا"، هەروەها خۆشحاڵیی خۆیی دەربڕی و گوتی: "زۆر سەرسامم بەشێوازی کارکردنی فێرخوازەکانمان".

شایانی باسە ئەمە یەکەمجارە زانکۆی ئەمریکیی عێراق، سلێمانی بەشداری لەپێشبڕکێی جیسوبدا بکات، ئەگەرچی ساڵی ٢٠١٦ پێشبڕکێ بەراییە ئامادەسازیەکەی تایبەت بەم پێشبڕکێ نێودەوڵەتییەی لەئامیز گرت.

پێویستە ئەوەش بگوترێت: زانکۆی ئەمریکیی سلێمانی، یەکەمین دامەزراوەی قازانجنەویستە لەعێراقدا بۆ خوێندنی باڵا لەسەر شێوازی ئەمریکی، کە ئەمساڵ یادی دەیەمین ساڵوەگەڕی دامەزراندنی خۆیی کردەوە، هەروەها یەکەمین زانکۆی تایبەتییە لەهەرێمی کوردستانی عێراق کە لەلایەن حکومەتی بەغداو حکومەتی هەرێمی کوردستانەوە بەفەرمی متمانەی پێ دراوەو رێژەی رەگەزی مێ لەناو فێرخوازەکانیدا لەسەروی ٣٥٪ ەوەیە. ئەم زانکۆیە، حاڵی حازر فێرخوازێکی زۆری لەپێکهاتە کۆمەڵایەتییە جۆراوجۆرەکانی عێراق گرتۆتەخۆ: کوردو عەرەب و تورکمان، سوننەو شیعە، ئێزدی و کریستیان، لەپاڵ چەندین فێرخوازی ئاوارە لەسوریاوە.

بۆ زانیاریی زیاتر دەربارەی زانکۆکەو پرۆگرامەکانی، هاوڕێمانبە لەتویتەرو فەیسبوک، یان سەردانی وێبسایتەکەمان  بکە: www.auis.edu.krd

بۆ کاروباری میدیایی، پەیوەندی بە "بژار بۆسکانی – راوێژکاری کاروباری میدیایی و پەیوەندییە گشتیەکان" ەوە بکە ، لەڕێی ئەم ئیمەیلەوە: bzhar.ali@auis.edu.krd

بۆ کۆمەککردنی زانکۆکەو فێرخوازەکانی "ئەگەر ئارەزوی کارێکی وەهات کرد" سەردانی وێبسایتی دامەزراوەی زانکۆی ئەمریکی لەعێراق ، AUIF  بکە، یان پەیوەندی بەئۆفیسی "لیزا ئۆکونور سترود ەوە بکە، لەڕێی ئەم ئیمەیڵەوە: liza.oconnor@auis.edu.krd