دامەزراوەی هیواو زانکۆی ئەمریکیی سلێمانی مینحەیەکی نوێی خوێندن رادەگەیەنن

Thursday, January 24, 2019 - 14:00
 
 
 
زانکۆی ئەمریکیی عێراق ، سلێمانی و دامەزراوەی هیوا ، ئەمڕۆ ،  هەواڵی دروستکردنی سندوقێکی سەر بەدامەزراوەی هیوایان راگەیاند . ئامانج لەدروستکردنی ئەم سندوقە بریتییە لەکۆمەککردنی خوێندنی ئەو فێرخوازانەی زانکۆی ئەمریکیی سلێمانی کە لەڕوی ئەکادیمییەوە لیوەشاوەن و پێویستیان بەکۆمەکی داراییە . مینحە نوێیەکەی خوێندن کە فێرخوازانی پرۆگرامی بەکالۆریۆس و پرۆگرامی ئامادەسازیی ئەکادیمی دەگرێتەوە ، کرێی خوێندن دەستەبەر دەکات .
 
لیژنەیەکی هاوبەش لەدامەزراوەی هیواو زانکۆی ئەمریکیی سلێمانی ، لەسەر بنەمای کۆمەڵێک پێوەری بابەتی و بێلایەن کە لیژنەکە خۆی دیارییان  دەکات ، یەکەم دەستەی فێرخوازی هەڵبژارد کە هەشت کەس بون.
 
بەڕێزان هیوا رەئوف و نیان عەبدوڵڵا ، کە لەدامەزرێنەرانی دامەزراوەی هیوان ، نیوەڕۆخوانێکیان بۆ فێرخوازە هەڵبژێردراوەکانی خولی یەکەمی مینحەکە سازکرد ، تیایدا هەردو ناوبراو ئەزمونی ئەکادیمی و پیشەیی خۆیانیان بۆ فێرخوازەکان باس کرد ، فێرخوازەکانیش بەشبەحاڵی خۆیان گوزارشتیان لەهیواو ئاواتی ئایندەی خۆیان کرد .
 
دەربارەی دامەزراوەی هیوا 
 
دامەزراوەی هیوا رێکخراوێکی ناحکومییە ، بارەگاکەی لەسلێمانییە لەهەرێمی کوردستانی عێراق . هیوا رەئوف و خاتو نیان عەبدوڵڵای هاوسەری کە لەبیزنسکارانی سەرکەوتوی سلێمانین ، ساڵی ٢٠١٣ ئەم رێکخراوەیان دامەزراندوە . دامەزراوەی هیوا ، بڕوای بەبنیاتنانی کۆمەڵگەیەکی بەهێزە لەسەر بنەمای یەکسانی و دادپەروەریی کۆمەڵایەتی ، لەڕێی کۆمەککردنی خەڵک و خەون و خولیاکانیانەوە ، تا ببنە بەشێک لەکۆمەڵگەیەکی نوێی پۆزەتیف و تەندروست . لەساڵی ٢٠١٣ ەوە ، دامەزراوەی هیوا کۆمەکی چەندین پڕۆژەی کۆمەڵایەتیی جۆراوجۆرو کتێبی وەرگێڕدراو و فیلمی دۆکیۆمێنتەریی کردوە ، هەروەها کەرەستەی خوێندنی دابینکردوە لەسەرلەبەری ناوچەکەدا . ئەم دامەزراوەیە ، بەردەوام لەهەوڵی دروستکردنی پەیوەندی و شەراکەتی نوێدایە بەو بڕوایەوە کە ئەمە   کاریگەرترین رێگەیە بۆ دەستڕاگەییشتن بەگەورەترین کەرەتەکانی کۆمەڵگەو فرەچەشنترینیان .
 
دەربارەی زانکۆی ئەمریکیی عێراق ، سلێمانی 
 
زانکۆی ئەمریکیی عێراق – سلێمانی ، یەکەم زانکۆی ناحکومیی قازانجنەویستە لەعێراقدا کە لەسەر شێوازی ئەمریکی بەڕێوەدەچێت . ساڵی ٢٠١٧ ئاهەنگی یادی دەیەمین ساڵەی دامەزراندنی خۆیی گێڕا . هەروەها یەکەم زانکۆی ناحکومییە لەهەرێمی کوردستاندا کە متمانەی حکومەتی فیدراڵیی عێراق و حکومەتی هەرێمی کوردستانی بەدەست هێناوە . حاڵی حازر ژمارەیەکی زۆر فێرخوازی گرتۆتەخۆ ، لەسەرجەم پێکهاتە نەتەوەییەکانی عێراق و هەرێمی کوردستان . ٣٥٪ ی فێرخوازەکانی لەڕەگەزی مێنەن .